Boere staan saam om Japie Celliers tuis te verwelkom
Ermelo, Conrad Bouwer 06 October
Op 3 Oktober 2024 het die boeregemeenskap van Ermelo in ’n kragtige vertoon van solidariteit saamgekom om Japie Celliers tuis te verwelkom ná ’n lang en uitdagende herstelproses. Japie was vir bykans twee maande in die hospitaal ná ’n verwoestende veldbrand op 11 Augustus 2024. Hy het na sy plaas teruggekeer waar medeboere ’n emosionele en roerende huldeblyk gelewer het.
Die brand waarin Japie ernstig beseer is, het ook die lewe van ’n ander boer geëis wat saam met hom teen die vlamme geveg het. Sterk winde het die brand vinnig versprei en albei mans is in die vlamme vasgevang. Terwyl die gemeenskap gerou het oor die verlies van een van hul eie boere, het hulle gebid vir Japie se herstel. Sy terugkeer, ná maande van behandeling en herstel, was ’n groot oomblik van vreugde en dankbaarheid.